Bërja kurban për të vdekurit dhe madhërimi i varreve.

Home >> Kapitulli i dytë >> Tema 3: Bërja Kurban për ...

Kapitulli i dytë | Tema e tretë |
Bërja Kurban për të vdekurit dhe madhërimi i varreve

Profeti (paqja qoftë mbi të), gjatë gjithë jetës së tij, është përpjekur që t'i bllokojë të gjitha rrugët e mundshme që të shpien drejt formave të ndryshme të shirkut. Më poshtë po përmendim disa nga mënyrat parandaluese, me anën e të cilave ai synonte ndërgjegjësimin e muslimanëve, në lidhje me rrezikun e adhurimit të varreve:

1. Profeti (paqja qoftë mbi të) e ka ndaluar tejkalimin e kufijve të respektimit të njerëzve të mirë, pasi kjo gjë mund të çojë, me kalimin e kohës, në adhurimin e tyre edhe nëse njerëzit nuk e kanë për qëllim një gjë të tillë. Profeti (paqja qoftë mbi të) ka thënë:

   Mos i kaloni kufijtë, sepse kalimi i kufijve është bërë shkak për shkatërrimin e popujve të mëparshëm.

   Mos më ngrini aq lartë sa e ngritën kristianët Isain, birin e Merjemes, pasi unë jam një prej robërve të Allahut, ndaj gjithmonë thoni për mua se jam Rob i Allahut dhe i Dërguari i Tij.

2. Profeti na ka ndaluar që t'i lartësojmë varret nga toka, apo të ndërtojmë diçka sipër tyre. Transmetohet se Aliu, djali i xhaxhait të Profetit, i tha njërit prej shokëve të tij:
   

   A dëshiron të të ngarkoj me një detyrë, të cilën ma ka ngarkuar Profeti dhe mua. Mos lër asnjë statujë pa thyer dhe asnjë varr të ngritur nga toka pa e sheshuar.

   Ndërsa një shok tjetër i Profetit (paqja qoftë mbi të), Xhabiri, ka thënë:

   Profeti (paqja qoftë mbi të) na ka ndaluar që të ulemi sipër varreve, apo të ndërtojmë diçka sipër tyre.

3. Profeti (paqja qoftë mbi të) na e ka ndaluar faljen e namazit në varreza:
   

   Popujt që kanë qenë para jush i shndërruan varret e profetëve të tyre në vende faljeje. Mos veproni si ata! Unë jua ndaloj këtë gjë.

Megjithatë, shumë njerëz nuk ua kanë vënë veshin ndalimeve të Profetit (paqja qoftë mbi të), si rrjedhojë, me kalimin e kohës, ranë në grackën e shirkut të madh. Ne jemi dëshmitarë të asaj që po ndodh sot në shumë varre, rreth të cilave janë ngritur tyrbe e teqe, ku kryhen të gjitha format e shirkut të madh, si p.sh. lutja e të vdekurve, prerja e kurbanit, kërkimi i ndihmës, bërja e premtimeve etj.

Ibnul Kajjim shkruan në një prej librave të tij:

Nëse do të bëjmë një krahasim midis udhëzimeve të Profetit (paqja qoftë mbi të) në lidhje me varret dhe gjendjes së shumë njerëzve në kohën e sotme, do të shohim se ato bien plotësisht ne kundërshtim me njëra-tjetrën. Kështu, Profeti (paqja qoftë mbi të) e ka ndaluar faljen e namazit pranë varreve, ashtu siç ka ndaluar edhe shndërrimin e tyre në vende faljeje, ndërsa ata, jo vetëm që falen e ndërtojnë xhamia nëpër varreza, por edhe i quajnë ato me lloj-lloj emrash të tjerë. Ai na ka urdhëruar që të rrafshojmë çdo varr të ngritur, siç transmetohet në një hadith të Muslimit, ndërsa ata i ngrejnë varret në lartësinë e shtëpive dhe ndërtojnë kubé e tyrbe sipër tyre. Shih se ç'kontrast i madh egziston midis fjalëve e udhëzimeve të Profetit dhe veprimeve të këtyre njerëzve.

S'ka dyshim se dëmet që shkaktohen si pasojë e këtyre veprimeve të pabaza janë të shumta. Vizita e varreve, sipas Islamit, bëhet me qëllim që vizitori të përkujtojë Botën tjetër dhe, në të njëjtën kohë, të bëjë dua për të vdekurin në mënyrë që Allahu ta mëshirojë e ta falë atë. Ndërsa këta idhujtarë nuk i japin fare rëndësi këtij aspekti, por e kanë ndërruar tërësisht qëllimin e vizitës së varreve. Ata nuk shkojnë për t'u lutur për të vdekurit, por për t'iu lutur atyre, apo për t'i bërë ata ndërmjetësa ndërmjet tyre dhe Allahut, apo për të kërkuar prej tyre gjëra që janë plotëhisht në kompetencën e Tij, si plotësimi i nevojave të ndryshme, shërimin e sëmundjeve etj. Me këto veprime ata nuk i bëjnë keq vetëm vetes së tyre, por edhe të vdekurit, pasi ai nuk mund të përfitojë prej lutjeve të tyre për falje e mëshirë nga Allahu i Madhëruar.

Nga sa përmendëm më sipër kuptojmë se flijimet dhe premtimet që bëhen në adresë të varreve janë pjesë e shirkut të madh. Shkaku që i shtyu këta njerëz të arrijnë deri në këtë fazë, s'ka dyshim se është moszbatimi i udhëzimeve të Profetit (paqja qoftë mbi të), në lidhje me gjendjen, në të cilën duhet të jenë varret. Shumë injorantë besojnë se të vdekurit që ndodhen brenda këtyre varreve janë në gjendje që t'i ndihmojnë në plotësimin e nevojave të tyre, ndaj dhe u kërkojnë ndihmë, duke u ofruar kurbane dhe premtime. Me kalimin e kohës këto varre u shndërruan në idhuj, të cilët adhurohen në vend të Allahut. Profeti (paqja qoftë mbi të) ka thënë:
O Zoti im, mos lejo që varri im të bëhet idhull e të adhurohet nga njerëzit.

Shkaku që e shtyu Profetin (paqja qoftë mbi të) të bënte këtë dua ishte se ai e dinte se një gjë e tillë do të ndodhte me varret e shumë të tjerëve. Dhe me të vërtetë, kjo gjë ka ndodhur në shumë prej vendeve të Botës Islame. Ndërsa varri i Profetit është ruajtur nga Allahu për shkak të duasë së tij, pavarësisht nga disa veprime të pabaza që bëjnë disa injorantë e sharlatanë pranë varrit të tij, sepse ata nuk mund të arrijnë dot tek varri i tij, pasi ai ndodhet brenda shtëpisë së tij dhe është i rrethuar me mure të trasha, të cilat e ndajnë nga pjesa tjetër e Xhamisë së Profetit në Medine.¹

---

• Fundnota:
• ¹ Shkaku i ndodhjes së varrit të Profetit brenda xhamisë së tij, është se pas vdekjes ai u varros brenda në shtëpinë e tij, e cila ishte ngjitur me xhaminë e tij, pasi, siç thuhet në një hadith të saktë, profetët duhet të varrosen në të njëjtin vend ku vdesin. Me kalimin e kohës, si rrjedhojë e zgjerimit të xhamisë varri u përfshi brenda territorit të saj dhe në të njëjtën kohë u rrethua me mure. Pra siç shihet ndodhja e varrit në këtë vend nuk është diçka e qëllimshme, por ishte rezultat i kushteve të asaj kohe.