Home >> Kapitulli i dytë >> Pretendimi i njohjes së Dijes së Fshehtë

Pretendimi i njohjes së Dijes së Fshehtë

Ç'është Dija e Fshehtë (El- Gajb)?

Me Dije të Fshehtë nënkuptohet çdo gjë që nuk mund të njihet nga njerëzit, qoftë prej atyre gjërave që kanë ndodhur në të shkuarën apo do të ndodhin në të ardhmen. Vetëm Allahu është në gjendje që t'i dijë këto gjëra:

“Thuaj: Askush, as në qiell as në tokë, nuk e di të fshehtën përveç Allahut.”
{27:65}

Megjithatë, për një qëllim apo një tjetër, Allahu mund t'u tregojë të dërguarve të Tij disa gjëra prej kësaj dijeje, siç thuhet dhe në këtë ajet:

“(Vetëm Ai është) Njohësi i të fshehtës, të cilën Ai nuk ia zbulon askujt, me përjashtim të ndonjë të dërguari që Ai dëshiron.”
{72:26-27}

Shkaku i zbulimit të një pjese të Dijes së Fshehtë për profetët, qëndron në faktin se ata kanë pasur nevojë për kryerjen e mrekullive të ndryshme, tek të cilat futet edhe njofitimi i disa gjërave nga Dija e Fshehtë, për t'u provuar njerëzve vërtetësinë e profetësisë së tyre.

Me fjalën "të dërguar", në ajetin e mësipërm nënkuptohen vetëm të dërguarit e dërguar nga Allahu, qoftë prej njerëzve apo prej engjëjve, ndaj çdokush që pretendon se di të Fshehtën, nëpërmjet çfarëdolloj mjeti, fjala vjen filxhanit, pëllëmbës së dorës, yjeve, magjisë etj., është gënjeshtar dhe jobesimtar.

Në kohën e sotme shohim disa sharlatanë që pretendojnë se janë në gjendje t'u tregojnë njerëzve vendin e gjërave të humbura, apo shkakun e disa sëmundjeve të ndryshme. Këta njerëz nuk bëjnë gjë tjetër, veçse kërkojnë ndihmën e xhindëve dhe shejtanëve, të cilët, pasi dëgjojnë fshehurazi bisedat që bëjnë engjëjt me njëri-tjetrin, ua përcjellin atyre duke shtuar plot gënjeshtra të tjera. ¹

Disa të tjerë pretendojnë se janë në gjendje të parashikojnë ngjarje të ndryshme që mund ndodhin në tokë me anën e lëvizjes së yjeve. Të gjithë jemi dëshmitarë të asaj që botohet në shumë revista e gazeta nën titullin
"Horoskop"², ku u tregohet njerëzve se fati dhe jeta e tyre janë të lidhura ngushtë me lëvizjen e yjeve. Jo rallë, mund të ndodhë që tek këta njerëz të shkojnë dhe disa "muslimanë" injorantë me besim të dobët, të cilët janë kureshtarë të dinë se ç'do t'u ndodhë në të ardhmen, pasi ata besojnë se këta njerëz janë në gjendje ta bëjnë një gjë të tillë.

---

• Fund nota:
• ¹ Allahu i Madhëruar u tregon engjëjve lajme të ndryshme që mund të ndodhin në tokë, ndaj dhe ata bisedojnë me njëri-tjetrin për atë që u ka treguar Allahu. Xhindët, të cilëve Allahu u ka dhënë aftësi të jashtëzakonshme, ngjiten në qiell për të dëgjuar nga bisedat e engjëjve. Para dërgimit të Muhamedit (paqja qoftë mbi të) xhindët nuk gjenin ndonjë pengesë për të dëgjuar bisedat e engjëjve. Pas dërgimit të tij, ata filluan të goditen me yje, në mënyrë që të mos dëgjojnë gjë. Megjithatë, në disa raste goditja mund të vijë pasi kanë dëgjuar disa gjëra, të cilat më pas ua transmetojnë magjistarëve dhe falltorëve në tokë dhe në të njëjtën kohë shtojnë dhe njëqind gënjeshtra të tjera. Për këtë arsye mund të gjesh në fjalët e falltorevë dhe fjalë të vërteta, po kjo, jo se ata e dinë të fshehtën, por sepse bashkëpunojnë me xhindët. (Shih suren : El-Xhin).
• ² Ky është një problem mjaft i mprehtë që haset shumë në vendin tonë, pasi nuk mund të gjesh pothuasjse asnjë gazetë apo revistë që të mos përmbajë, ndërmjet shkrimeve të saj, edhe horoskopin e javës. Kjo gjë ka bërë që një numër i konsiderueshëm njerëzish t'i kushtojnë rëndësi leximit të tij, duke harruar që fati i njeriut është në dorën e Allahut, i Cili vendos për gjithçka, ndërsa yjet nuk janë asgjë tjetër veçse disa prej krijesave të Tij, ashtu siç është dhe vetë njeriu.

Për të dëgjuar komentin të plotë të Librit të Teuhidit, ju këshilloj videon e Hoxhë Ismail Bardhoshit